GVG Startseite

Assicuranza

 

Spargnar energia – ma betg a cust da Vossa segirezza!

Indrizs da stgaudar da tut gener dovran aria da combustiun en quantitad suffizienta per ina funcziun irreproschabla – independentamain dal fatg, sch'els funcziunan cun gas, ieli, pellets u laina. 
Sche questa aria na stat betg a disposiziun en quantitad suffizienta, sa sviluppa monoxid carbonic toxic tras ina combustiun incumpletta.
Sche l'aria frestga or dal liber n'alimentescha betg suffizientamain il local da stgaudament, sa furma là ina sutpressiun. Quai po chaschunar la sortida da monoxid carbonic or da l'agregat da combustiun en il local. 
Quest gas toxic senza colur e senza odur vegn da penetrar paraids e palantschieus sura da tut ils materials da construcziun usitads e po consequentamain esser privlus per las abitantas ed ils abitants da l'entir edifizi.
L'approvisiun d'aria frestga e d'aria da combustiun or dal liber sto esser garantida permanentamain. 

 

Ulteriuras infurmaziuns chattais Vus en noss rapport: Stgaudar a moda segira durant l'enviern da stgarsezza d'electricitad.

 

Assicuranza

Nossa assicuranza procura per ina segirada favuraivla da tut ils edifizis en cas da donns da fieu e donns elementars. Nus protegin Vus da las consequenzas economicas d'in donn cun surpigliar ils custs da la reconstrucziun. La partiziun d'assicuranza elavura ils cas da donn a moda cumpetenta e gida gugent Vus en cas da dumondas.

Prevenziun

Nossa protecziun cunter incendis e nossas expertas e noss experts da donns elementars procuran per ina segirtad persistenta da Voss edifizi. Nus promovain e pretendain mesiras per impedir donns da persunas, d'animals, da chaussas e da l'ambient en connex cun l'edifizi. Ina buna prevenziun evitescha donns futurs e gida da tegnair bassas las premias a lunga vista. Sco center da cumpetenza per la protecziun d'edifizis cussegliain nus gugent Vus en dumondas davart la protecziun cunter incendis e la prevenziun da donns elementars.

Pumpiers

Ils corps da pumpiers grischuns gidan cun pumpiers bain scolads ed equipads d'evitar e reducir donns da fieu e donns elementars. Noss team da pumpiers da la GVG organisescha e surveglia ils fatgs da pumpiers grischuns e contribuescha uschia a moda persistenta a la segirtad da la populaziun grischuna. Sco center da cumpetenza per la segirtad cussegliain nus Vus a moda cumplessiva en dumondas d'intervenziun.

Cassa per donns elementars

Nossa Cassa per donns elementars dal Grischun (CDE) paja contribuziuns en cas da donns elementars betg assicurabels vi d'immobiglias, cultiras e lur avertura e protegia, cumplettond l'Assicuranza d'edifizis, cunter las consequenzas economicas d'eveniments da la natira ordaifer ils edifizis. Ella è in'instituziun da dretg public independenta che vegn manada da l'Assicuranza d'edifizis dal Grischun.

 

A la pagina iniziala da la CDE