Cassa per donns elementars
Cas da donn ESK
En cas da donn essan nus qua per Vus. Annunziai per plaschair immediat in donn da Voss bain immobigliar e suandai ils tschintg pass descrits sutvart. Gugent cussegliain e gidain nus Vus da liquidar il donn.
Ulteriur proceder suenter l'annunzia dal donn
Pass 1
Instradar mesiras immediatas
Prendai tut las mesiras necessarias per evitar ulteriurs donns. Questas mesiras ston sa limitar unicamain a la reducziun dal donn.
Pass 2
Documentar il donn
Faschai fotografias che mussan bain la dimensiun dal donn. Ina documentaziun cumpletta ans gida considerablamain a giuditgar il donn.
Pass 3
Reconstruir suenter la garanzia da contribuziun
Cun la reconstrucziun pudais Vus cumenzar pir, cura che Vus avais survegnì nossa garanzia da custs. Da princip sto la persuna donnegiada far las lavurs da reconstrucziun cun ils meds da l'agen manaschi, sche quai è raschunaivel e supportabel. Sch'i n'è betg pussaivel da far tschertas lavurs en atgna reschia, supplitgain nus da retrair sco emprim offertas da manaschis spezialisads.
Pass 4
Documentar las atgnas prestaziuns
Documentai Vossas atgnas prestaziuns ed ans inoltrai ils documents correspundents ensemen cun ils quints eventualmain gia pajads a manaschis spezialisads e l'adressa da pajament (IBAN).
Pass 5
Survegnir la prestaziun da contribuziun
Suenter che nus avain retschet Voss documents e l'adressa da pajament (IBAN), As assegnain nus nossas prestaziuns da contribuziun inclus ina contribuziun supplementara dal fondsuisse, sche Vus avais il dretg d'ina tala.
Dumondas e respostas – Cas da donn ESK
La cassa paja ina contribuziun per lavurs da rumida e da reconstrucziun en cas da donns da bains immobigliars betg utilisads per intents commerzials, per surfatschas agriculas e territoris d'alpegiada e per stabiliments d'avertura e da segirezza.
- Donns pervi da schelira, ruttadiras da lingias ordaifer ils edifizis, etc. na vegnan betg indemnisads da la Cassa per donns elementars. Donns da quest gener èn cuverts per part sur assicuranzas privatas per donns d'aua vi d'edifizis.
- En cas da donns en il territori abità e vi d'edifizis ordaifer il territori abità po il conturn da la chasa vegnir assicurà a moda privata. La Cassa per donns elementars po dar contribuziuns mo per donns betg assicurabels.
- Bains immobigliars utilisads per intents commerzials sco lavuratoris communals, plazzas da golf e da tennis.
La Cassa per donns elementars paja contribuziuns dad 80 % da la summa dal donn imputabla (= ils custs per reconstruir il stadi oriund resp. ils custs suenter avair deducì las plivalurs e meglieraziuns).
Nus pajain la contribuziun da princip a la proprietaria u al proprietari. La persuna che ha prendì a fit l'edifizi u che ha il dretg da construcziun survegn l'indemnisaziun, sch'ella ha il dretg da tala tenor la lescha u il contract. Eventuals quints da manaschis na vegnan betg pajads directamain da nus.
Il fondssuisse paja sin basa voluntara ina contribuziun supplementara da maximalmain 10%. Las contribuziuns voluntaras sa drizzan tenor las relaziuns finanzialas imputablas da la persuna donnegiada. La Cassa per donns elementars gestiunescha il fondssuisse.
L'annunzia da reconstrucziun sto succeder entaifer dus onns suenter ch'il donn è succedì.
Il dretg da contribuziuns han persunas dal dretg privat. La Confederaziun, ils chantuns, las vischnancas ed autras corporaziuns da dretg public na vegnan betg resguardads.