99% dals edifizis en il chantun Grischun èn assicurads per la valur da nov.

 

Excepziuns

 

• Sche la valur actuala da l'edifizi è pli bassa che 50% da la valur da nov, è assicurada mo la valur actuala.
• Sch'in edifizi na correspunda betg a las prescripziuns da construcziun, a las prescripziuns per la protecziun cunter incendis u a las reglas da la scienza da construcziun, è assicurada la valur actuala.
• Edifizis ch'èn destinads per vegnir demolids u che n'èn betg pli duvrabels pervia da lur decadenza, èn assicurads per la valur da demoliziun.
• Objects da demoliziun èn assicurads per la valur da demoliziun.
• En cas spezials vegn fixada ina summa d'assicuranza fixa.

 

Valurs d'edifizis

L'Uffizi per la valitaziun d'immobiglias (UVI) eruescha per incumbensa da nus las datas decisivas per l'Assicuranza d'edifizis dal Grischun. Las valurs che l'UVI eruescha (valur da nov, sminuziun da la valur/valur actuala) furman la basa per nossas summas d'assicuranza. En connex cun la valitaziun da revisiun trametta l'UVI in questiunari a Vus. Sche Vus faschais sez la dumonda per ina valitaziun, stuais Vus cumplettar l'entir formular. Sin fundament da las indicaziuns che l'UVI ha survegnì da la proprietaria u dal proprietari ubain da l'administratura u l'administratur decida el, schebain i dovra ina visita u sche las indicaziuns bastan al biro per valitar da nov l'immobiglia.

 

Inditgai a l'UVI tut las investiziuns e lavurs da mantegniment fatgas dapi l'ultima valitaziun uffiziala. Per che tut las investiziuns possian vegnir resguardadas en cas che Vossa immobiglia vegn valitada da nov, inditgai per plaschair era las investiziuns che augmentan la valur che Vus avais eventualmain gia annunzià a l'Assicuranza d'edifizis dal Grischun. I stat fitg a cor a nus che la valitaziun nova reflecteschia il stadi actual da Voss edifizis (valur da nov, sminuziun da la valur/valur actuala, designaziun da l'edifizi, classa da l'edifizi, diever, etc.) per ch'ils edifizis sajan assicurads correctamain ed ils custs sajan cuvrids suffizientamain en cas da donn. Cunquai che l'UVI na fa betg adina ina visita per far la valitaziun uffiziala, èn Vossas indicaziuns cumplettas da gronda impurtanza gia avant la valitaziun effectiva.

 

Controllai per plaschair tut las valurs ed indicaziuns suenter che Vus avais retschet il nov avis da valitaziun da l'UVI. En cas da dumondas en connex cun il questiunari u davart l'avis da valitaziun, As drizzai directamain a l'UVI.

 

Definiziuns da las valurs d'assicuranza Definiziuns da las valurs d'assicuranza

Valur da nov

Ils custs necessaris per reconstruir in edifizi dal medem tip, cun las medemas dimensiuns e las medemas construcziuns internas en il medem lieu.

 

Valur actuala

La valur da nov main la svalitaziun tecnica en consequenza da vegliadetgna, isada, influenzas da l'aura, donns da construcziun, mancanzas da construcziun u auters motivs.

 

Midada da l'assicuranza da la valur da nov a la valur actuala – consequenzas en cas da donn

Edifizis cun ina valur actuala da main che 50% resp. cun ina sminuziun da la valur da passa 50% èn assicuradas cun la valur actuala. En cas d'in donn total è l'indemnisaziun da l'Assicuranza d'edifizis limitada a la valur actuala. En cas d'in donn parzial vegnan indemnisads ils custs da reconstrucziun sulettamain per la valur actuala (p.ex.: in culp da chametg che dat en il tetg d'in edifizi assicurà per la valur actuala chaschuna in donn da CHF 10'000.00, la valur actuala stimada munta a 45%, l'indemnisaziun importa 45% dal donn da l'edifizi = CHF 4'500.00).

 

Valur da demoliziun 

La valur da vendita dal material da construcziun, sche quella surpassa ils custs da demoliziun.

 

Augmentar la summa d'assicuranza

Avais Vus renovà u investì? Infurmai nus davart las investiziuns che han augmentà la valur e davart lur dimensiun.

Nossas summas d'assicuranza sa basan per regla sin la valitaziun uffiziala da l'Uffizi per la valitaziun d'immobiglias (enfin il 2018 Uffizi da stimaziun).

 

En ils suandants cas pudain nus adattar la summa d'assicuranza:

• Construcziuns annexas, midadas d'edifizi u engrondiments cun custs che augmentan la valur da max. CHF 100'000.00, independentamain da la valur da l'edifizi.
• Construcziuns annexas, midadas d'edifizi u engrondiments cun custs che augmentan la valur da max. CHF 500'000.00, sch'ils custs na surpassan betg 20% da la valur da nov indexada da l'ultima valitaziun uffiziala.

 

En ils suandants cas sto vegnir dumandada ina valitaziun tar il biro da valitaziun responsabel:

• Construcziuns novas a partir da CHF 20'000.-
• Construcziuns annexas, midadas d'edifizi u engrondiments, sche la summa che augmenta la valur surpassa CHF 100'000.- per edifizi ed importa dapli che 20% da la valur da nov indexada da l'edifizi.
• Construcziuns annexas, midadas d'edifizi u engrondiments, sche la summa che augmenta la valur surpassa CHF 500'000.- per edifizi.

 

Las basas legalas da l'Uffizi per la valitaziun d'immobiglias chattais Vus sin www.aib.gr.ch