La suandanta missiun descriva l'intent, l'incumbensa e l'autodefiniziun da la GVG: 

«Sco instituziun independenta da dretg public assicurescha la GVG edifizis en il chantun Grischun a moda cumplessiva e per ina premia uschè favuraivla sco pussaivel cunter donns da fieu e donns elementars (p.ex. aua gronda, stemprads, pressiun da la naiv). La GVG s'occupa tenor lescha da las incumbensas d'assicurar edifizis, da prevegnir a donns da fieu e donns elementars e da cumbatter quels. L'element central per segirar a lunga vista l'existenza da la GVG è il management da ristgas integral.»

La GVG ha la suandanta visiun: 

«Segirar a moda persistenta – assicurar a moda democratica»

Quai signifitga dad ina vart che la GVG vul segirar ed assicurar a moda persistenta. Per cuntanscher questa finamira duai ella impunder ses meds a moda effizienta ed effectiva ( = economicamain persistent). Las consequenzas da la midada dal clima duain vegnir identifitgadas ad uras, uschia ch'ins po instradar a temp mesiras da prevenziun correspundentas (= ecologic). Ella promova la solidaritad tranter persunas donnegiadas e la societad e sustegna la prosperitad dal chantun ( = social). Da l'autra vart sa chapescha la GVG sco «assicuranza dal pievel» che pussibilitescha a las abitantas ed als abitants dal Grischun da profitar da prestaziuns excellentas. Las Grischunas ed ils Grischuns mainan e gidan da purtar ella a moda democratica. Per consequenza ha ella la pretensiun a sasezza che la populaziun saja «loscha dad ella». Il Cussegl grond sco represchentant da la populaziun e la Regenza defineschan democraticamain l'incumbensa politica e legala da la GVG. Cun lur collavuraziun en la cumissiun administrativa ed en il Cussegl grond gidan las represchentantas ed ils represchentants da l'Associaziun dals proprietaris da chasas a concepir democraticamain las cundiziuns da basa da la GVG.