Las chartas da privels mussan ils territoris periclitads e furneschan tranter auter las basas per determinar las zonas da privel en la planisaziun d'utilisaziun.
Chartas da privels
Sa basond sin la Lescha federala davart la correcziun dals curs d'aua e la Lescha federala davart il guaud èn ils chantuns obligads d'elavurar chartas da privels per aua gronda, lavinas, bovas e crudadas sco era da resguardar quellas en connex cun activitads che han in effect sin il territori. L'Uffizi da guaud e privels da la natira dal Grischun coordinescha e reglescha l'elavuraziun e la revisiun da las chartas da privels.
Agid da leger: Chartas da privels per privels gravitativs da la natira
Las chartas da privels pon ins consultar qua sin ina charta interactiva.
Las colurs per marcar territoris da privel
Ils territoris da privel resp. las colurs per marcar quels vegnan definids sin basa da l'intensitad e da la probabladad dals singuls tips da privels:
cotschen: privel considerabel
- persunas èn periclitadas tant en il liber sco er en edifizis
- igl è da quintar che edifizis vegnan destruids andetgamain
=> Betg zavrar novas zonas da construcziun; betg lubì da construir u d'amplifitgar edifizis e stabiliments.
blau: privel mesaun
- en edifizis èn persunas strusch periclitadas, en il liber dentant bain
- igl è da quintar cun donns vi d'edifizis, dentant n'èsi betg da spetgar che edifizis vegnian destruids andetgamain, sche tschertas pretensiuns areguard la moda da construir vegnan resguardadas
=> Zavrar novas zonas da construcziun mo suenter ch'ils interess èn vegnids considerads.
mellen: privel minim
- persunas èn strusch periclitadas
- igl è da quintar cun donns minims vi d'edifizis resp. cun impediments, dentant poi dar donns materials considerabels en edifizis
=> Infurmar davart la situaziun da privel; resguardar las recumandaziuns u propostas da l'Assicuranza d'edifizis dal Grischun per edifizis novs (p.ex. foras da glisch elevadas cunter inundaziuns) u suenter donns.
Surfatscha schraffada cun mellen ed alv: privel restant
- zona da sensibilisaziun che mussa ina periclitaziun restanta resp. ina ristga restanta cun ina probabladad fitg pitschna
=> Infurmar davart la situaziun da privel; en cas da dievers sensibels e d'in grond potenzial da donn lubir mo sut cundiziuns.
alv: nagin privel u in privel negligibel
Zonas da privel
Sa basond sin las chartas da privels vegnan zavradas duas categorias da zonas da privel sco basa per la planisaziun dal territori. Questa basa gida da concepir l'utilisaziun dal spazi, uschia ch'i na resultan naginas novas ristgas. Las zonas da privel vegnan mussadas sin ils plans da zonas da la planisaziun d'utilisaziun ed èn liantas per las proprietarias ed ils proprietaris.
En la zona da privel 1 (cotschen) èsi scumandà da construir, en la zona da privel 2 (blau) èsi pussaivel da construir sut cundiziuns. Ils projects da construcziun vegnan examinads d'inschigneras e d'inschigners da controlla tschernids da l'Assicuranza d'edifizis. L'examinaziun po vegnir extendida sin la realisaziun da la construcziun. La procedura da l'inschignera u l'inschigner da controlla succeda en trais pass: examinaziun preliminara, examinaziun principala e collaudaziun.
Las zonas da privels pon ins consultar qua sin ina charta interactiva.