Protecziun cunter incendis per indrizs fotovoltaics
Tut tenor sort, lieu, concepziun e grondezza da l'indriz solar dovri ina procedura da permissiun differenta. Areguard las pretensiuns envers la procedura da permissiun renviain nus al "Mussavia per implants solars" da l'Uffizi per il svilup dal territori (UST).
L'indriz fotovoltaic fa part da las installaziuns internas, correspundentamain valan per las installaziuns electricas l'ordinaziun da las installaziuns a bassa tensiun OIBT e la norma da las installaziuns a bassa tensiun NIBT (SN 411 000). Da resguardar èn medemamain ulteriuras normas, directivas ed ordinaziuns che represchentan il "stadi da la tecnica". L'execuziun da questas leschas ed ils documents davart il stadi da la tecnica na fan betg part dal champ da cumpetenzas da l'Assicuranza d'edifizis dal Grischun, partiziun protecziun cunter incendis.
L'Assicuranza d'edifizis dal Grischun, protecziun cunter incendis, na dat damai naginas permissiuns da la polizia da fieu per indrizs fotovoltaics sin tetgs e vi da fatschadas. L'indriz sto però vegnir annunzià a la vischnanca cun il formular d'annunzia e d'autodecleraziun.
Areguard indrizs fotovoltaics vi da fatschadas renviain nus a las suandantas explicaziuns e supplitgain da trametter la decleranza da consentiment emplenida / las cumprovas a l'Assicuranza d'edifizis dal Grischun, protecziun cunter incendis.
Attenziun:
Mintga indriz fotovoltaic sto era vegnir annunzià al gestiunari da la rait. Indrizs isolads (p.ex. sin aclas) ston vegnir annunziads a l'Inspecturat federal d’installaziuns a current ferm (ESTI).
Disposiziuns cumplementaras areguard indrizs fotovoltaics vi da fatschadas
Sa basond sin la directiva per la protecziun cunter incendis da l'Uniun da las assicuranzas chantunalas cunter fieu (UAF) areguard il diever da materials da construcziun ston tavladiras da paraids exteriuras e/u isolaziuns termicas inflammablas ademplir pretensiuns areguard la protecziun cunter incendis. Las suandantas finamiras da protecziun ston esser accumplidas:
- Sche vegnan utilisads materials da construcziun inflammabels, sto l'access per ils pumpiers esser garantì.
- Cun construir ston tavladiras da paraids exteriuras e/u isolaziuns inflammablas vegnir repartidas uschia ch'in incendi a la paraid exteriura na po betg sa derasar per dapli che dus plauns sur il plaun da l'incendi, avant ch'ils pumpiers cumenzan a stizzar il fieu.
Per pudair impedir che l'incendi s'extendia sur la fatschada, ston fatschadas inflammablas esser segmentadas orizontalmain. La moda e maniera da la segmentaziun è tractada en la documentaziun Lignum sut 7.1 Paraids exteriuras, e dependa tranter auter dal tip da fatschada (singulas averturas da fanestras / retschas da fanestras orizontalas e/u verticalas, euv.) e da la sort da la tavladira. Confurm al senn ston questas pretensiuns era vegnir realisadas per indrizs fotovoltaics, cunquai ch'ils moduls fotovoltaics èn inflammabels.
Sco soluziun transitorica e per simplifitgar la planisaziun e las cumprovas necessarias, ha la Swissolar elavurà in document transitoric areguard la protecziun cunter incendis per indrizs fotovoltaics ventilads vi da fatschadas (versiun 1.00 dals 26 d'october 2023; www.swissolar.ch). En quest document transitoric vegnan indrizs fotovoltaics vi da fatschadas repartids en trais categorias da sistem (0, 1 e 2) ed i vegn inditgà sut tge cundiziuns che resulta la repartiziun en questas categorias.
Edifizis bass (fin ad in'autezza totala dad 11 m)
Categoria da sistem 0
Garanzia da la qualitad
Tenor la directiva per la protecziun cunter incendis da l'UAF 11-15 areguard la garanzia da la qualitad en la protecziun cunter incendis cifra 3.3.1 è previs en general il stgalim da garanzia da la qualitad SGQ 1 u 2. Sin il stgalim da garanzia da la qualitad SGQ 2 sto vegnir consultà areguard la planisaziun e la realisaziun durant il temp da construcziun in'experta u in expert da protecziun cunter incendis renconuschì da l'UAF (per manaschis d'alloschament, per locals che porschan plazza ad in grond dumber da persunas, per fatschentas da vendita, per locals d'industria e mastergn cun ina valur q da passa 1'000 MJ/m2 sco era per magasins cun regals auts).
Per indrizs da la categoria da sistem 0 sto vegnir inoltrada a l'autoritad da protecziun cunter incendis responsabla (Assicuranza d'edifizis dal Grischun, protecziun cunter incendis) ensemen cun il formular d'annunzia e d'autodecleraziun supplementarmain la decleranza da consentiment categoria da sistem 0.
Attenziun: tranter auter ston era vegnir resguardadas pretensiuns areguard la qualitad da la paraid exteriura.
Edifizis d'autezza mesauna (fin ad in'autezza totala da 30 m)
Categoria da sistem 1
Garanzia da la qualitad
Per indrizs fotovoltaics vi da fatschadas d'autezza mesauna è pretendì il stgalim da garanzia da la qualitad SGQ 3. Sin il stgalim da garanzia da la qualitad SGQ 3 sto vegnir consultà areguard la planisaziun e la realisaziun durant il temp da construcziun in'experta u in expert da protecziun cunter incendis renconuschì da l'UAF.
Per indrizs da la categoria da sistem 1 sto vegnir inoltrada a l'autoritad da protecziun cunter incendis responsabla (Assicuranza d'edifizis dal Grischun, protecziun cunter incendis) ensemen cun il formular d'annunzia e d'autodecleraziun supplementarmain la decleranza da consentiment areguard la cumprova da protecziun cunter incendis simplifitgada per indrizs fotovoltaics vi da la fatschada – categoria da sistem 1.
Las proprietarias ed ils proprietaris e las persunas responsablas per la garanzia da la qualitad areguard la protecziun cunter incendis surpiglian en atgna responsabladad l'observaziun da las prescripziuns da la Swissolar.
Indrizs che n'adempleschan betg las pretensiuns da la categoria da sistem 1 appartegnan a la categoria da sistem 2.
Chasas autas (fin ad in'autezza totala da 100 m)
Categoria da sistem 2
Per indrizs fotovoltaics vi da fatschadas d'edifizis d'autezza mesauna sco era da chasas autas da la categoria da sistem 2 è pretendì il stgalim da garanzia da la qualitad SGQ 3. Sin il stgalim da garanzia da la qualitad SGQ 3 sto vegnir consultà areguard la planisaziun e la realisaziun durant il temp da construcziun in'experta u in expert da protecziun cunter incendis renconuschì da l'UAF.
Tals indrizs fotovoltaics basegnan anc adina in concept che s'orientescha a las finamiras da protecziun. Igl èn necessaris mussaments a maun da provas da fieu.
Formulars da l'Assicuranza d'edifizis dal Grischun
- Meldeformular und Selbstdeklaration
- Übereinstimmungserklärung Systemkategorie 0
- Übereinstimmungserklärung "Vereinfachter Brandschutznachweis für PV-Anlagen an
der Fassade – Systemkategorie 1"
- GVG-Infoblatt "Elementarschadenprävention bei Solaranlagen"
Impurtantas basas per valitar e construir indrizs fotovoltaics
Vereinigung Kantonaler Feuerversicherungen VKF
- VKF-Brandschutzrichtlinie "Verwendung von Baustoffen"
- VKF-Brandschutzmerkblatt "Solaranlagen"
SWISSSOLAR
- Stand der Technik – zu VKF-Brandschutzmerkblatt Solaranlagen
- Brandschutz für hinterlüftete Photovoltaikanlagen an Fassaden
(Übergangsdokument für Planung und Brandschutznachweis – gültig bis 31.12.2024)
Da resguardar èn medemamain ulteriuras basas (OIBT ed NIBT sco er ils documents davart il stadi da la tecnica).