Igl ha dà in donn – tge far?
- Procurai per las mesiras immediatas urgentas per evitar donns consecutivs (pumpar ora aua, cuvrida d'urgenza, sientar stanzas e.u.v.).
- Ans annunziai immediat donns vi dad edifizis, il meglier online, incl. fotografias dal donn e la descripziun exacta da l'andament dal donn e da las parts donnegiadas da l'edifizi. Infurmai era Vossa assicuranza privata (mobigliar/bains movibels, assicuranza cunter donns chaschunads da l'aua, interrupziun dal manaschi e.u.v.).
- Spetgai cun la reparatura dal donn fin che nossa experta u noss expert per donns As contactescha. Prendai sulettamain las mesiras immediatas necessarias e na faschai naginas midadas che difficulteschan il scleriment dal donn.
Assicuranza
Nossa assicuranza procura per ina segirada favuraivla da tut ils edifizis en cas da donns da fieu e donns elementars. Nus protegin Vus da las consequenzas economicas d'in donn cun surpigliar ils custs da la reconstrucziun. La partiziun d'assicuranza elavura ils cas da donn a moda cumpetenta e gida gugent Vus en cas da dumondas.
Prevenziun
Nossa protecziun cunter incendis e nossas expertas e noss experts da donns elementars procuran per ina segirtad persistenta da Voss edifizi. Nus promovain e pretendain mesiras per impedir donns da persunas, d'animals, da chaussas e da l'ambient en connex cun l'edifizi. Ina buna prevenziun evitescha donns futurs e gida da tegnair bassas las premias a lunga vista. Sco center da cumpetenza per la protecziun d'edifizis cussegliain nus gugent Vus en dumondas davart la protecziun cunter incendis e la prevenziun da donns elementars.
Pumpiers
Ils corps da pumpiers grischuns gidan cun pumpiers bain scolads ed equipads d'evitar e reducir donns da fieu e donns elementars. Noss team da pumpiers da la GVG organisescha e surveglia ils fatgs da pumpiers grischuns e contribuescha uschia a moda persistenta a la segirtad da la populaziun grischuna. Sco center da cumpetenza per la segirtad cussegliain nus Vus a moda cumplessiva en dumondas d'intervenziun.
Cassa per donns elementars
Nossa Cassa per donns elementars dal Grischun (CDE) paja contribuziuns en cas da donns elementars betg assicurabels vi d'immobiglias, cultiras e lur avertura e protegia, cumplettond l'Assicuranza d'edifizis, cunter las consequenzas economicas d'eveniments da la natira ordaifer ils edifizis. Ella è in'instituziun da dretg public independenta che vegn manada da l'Assicuranza d'edifizis dal Grischun.
A la pagina iniziala da la CDE